رد: بيرم التونسى ... أعمالة الأدبية

من طرف **TOTO** الأحد 20 يونيو 2010 - 0:00

تنويعات

شي برتقان شي جزر شي خص
( لا تجاب كل الطلبات )
ان عيط الواد وقال لك اشتري نعناع
وحمصية ونبوت الغفير وبتاع
أوعك تطاوعي كلامه واعملي طرشة
والسقم والسم أصله من أيد البياع
( الملابس النظيفة )
بيعي الغوايش وهاتي للولد بدلة
وطلعي من جيوبه الكعب والنحله
وعلمية عالنظافة والأدب والذوق
أحسن يدور في الحواري يعجن الوحلة
( الخرافات )
وشيطلي قولة العفريت والغولة
ليطلع الواد عبيط والبنت مخبولة
متعرفيش الكلام ده يتلف الأولاد
ويفرجوكي المرار وتعيشي مخبولة
( آمين )
قريضة تأخد اللي زيك من دمن النسوان
وتموتي أحسن ولايكونشي الولد تلفان
خايبة .. ومايلة .. تدوسك كهربا قادر
ويستريح من فعايلك جوزك الغلبان
يكون في عون الجدع دي الحاجة غالية نار
يدوبك الشهر عالزياتوعالجزار
وانتي بسلامتك بتاكلي في قتة محلولة
مش فالحة غير تعملي لي كل شهرين زار
يحيب يمنين جوزك اللي غلبه المولي
يطلع يخطف : قولي لي بس يا دوله
القرش لبيض ينفع في النهار الأسود
بقا الفلوس للزارات ولا العيال أولي
دبقتي جوز الأساور من قفا المسكين
الوزن 100 عيارة أربعه وعشرين
ولما يسأل تفولي دول بتوع أختي
لهو أنت بتجيب أساور ؟ دانت عيشتك طين
تخدي الفلوس بالربا وتفصلي حبره
وتجرجري الديل وقال إيه واحدة معتبرة
إنشا الله عمرك ما توعي تفرحي بيها
ويحطوها لك نهار الغسل بالوبرة
حطي يا بنت الحلال قلبك علي قلبه
ودبري البيت وهو يعيش علي غلبه
دي كل واحدة فطينة يحبها جوزها
والناس يقولم يحب مراتة وتحبه
أول ما نبدي نصلي علي النبي
نبي وطني يلعن أبوك يا بخيت
تاني كلامى وفد مصر بلادنا
ولعشموعه والتقي الكبريت
تلاتين سنة يا مصر واحنا في ضلمة
لما حدايتنا ربت الكتاكيت
راحم رجال الوفد وادي فرنسا
أم الأدب والحظ والتنكيت
ستين سنة لا عمل تبيت
واشرب لي كبيتين نبيت
والعن أبو الشيخ كسفريت
الكافر الحادي عشر
قلت لكم الشيخ يتجلد
قلتولى اخرج م البلد
إيه رأيكم يا سامعين
في الشيخ كباب كفتة الأمين
طالع يعر المسلمين
أمال ياريته كان كفر
سي بخيت يابو دومة يا بو خلقة مشومه
لاديك بالشومة ان مكنتش ترجع
ظبطوك متنيل عالقصر محول
تجري وتتشندل وعامل واد مجدع
أتلم أحسن لك دا الشعب قاعد لك
بالصرمة يذلك اتأمل واسمع
شيا أعمش العين يادون من دون أهل الفضل
ياللي عشان هم بطنك تتربط في الحبل
الشاي كان عندنا والقرفة والمنزول
لكن تقول إيه بقى والحسبة فيها . اسطيل .
وأنت كمان ياللي ضبك ينقب الحيطة
يازبلة الفيل يامتعمم " بشلويطة "
إن كنت خرمان تعالي عندنا " البكرج "
يا بو بطن حامضة .. دي مش فتة .. دي تسليطه
يا تالت الفردتين قالوا عليك مسروع
لما دخلت أنت راخر عطفة الموضوع
لو كنت منك لكنت أشرب فنيك صافي
ولا كنت أقرب منهم لو أموت م الجوع

من طرف **TOTO** الأحد 20 يونيو 2010 - 0:02

حياتى

الأوله آه والتانية آه والتالتة آه
الأوله: مصر ، قالوا ( تونسى)) ونفونى
والتانية: تونس ، وفيها الأهل جحدونى
والتالتة: باريس ، وفى باريس جهلونى
الأوله: مصر ، قالوا ( تونسى)) ونفونى جزاة الخير
والتانية: تونس ، وفيها الأهل جحدونى وحتى الغير
والتالتة: باريس ، وفى باريس جهلونى ونا موليير
.
.
الأوله: مصر ، قالوا ( تونسى)) ونفونى جزاة الخير وأحسانى
والتانية: تونس ، وفيها الأهل جحدونى وحتى الغير ماصافانى
والتالتة: باريس ، وفى باريس جهلونى ونا موليير فى زمانى
.
.
الأوله : شربتنى من فراقها كاس بمرار
والتانية: آه فرجتنى ع الجمال ينداس ياخسارة
والتالتة: ياناس ياريتنى كان لى فيها ناس واداره
.
.
الأوله: أشتكيها للى أجرى النيل
والتانية: دمعى عليها غرق الباستيل
والتالتة: لطشت فيها ممتثل وذليل
والأوله آ
والتانية آه
والتالتة آه !

عتاب

ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!
ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم
من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم
ليه تهدمونى وناللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الاسيّه وانا راحل وسايبكم؟

في الطريق

أربع عساكر جبابرة يفتحوا برلين
ساحبين بتاعة حلاوة جاية من شربين
شايله على كتفها عيل عنيه وارمين
و الصاج على مخها يرقص شمال و يمين
إيه الحكاية يا بيه ؟ جال خالفت الجوانين ؟
إشمعنى مليون حرامى فى البلد سارحين
يمزعوا فى الجيوب و يفتحوا الدكاكين ؟
أسأل وزير الشئون و لا أكلم مين ؟

مناجاه

قريت و مليت كفايه .......... خوف السقوط و البطاله
و كل ما ازداد قرايه .......... بالدنيا أزداد جهاله
يا طالب العلم تنداس .......... لو يبقى علمك بضاعه
تنفع و تستنفع الناس .......... لو كنت صاحب صناعه
يا عالم العلم بالله .......... يزيد في نور البصيره
و اللي استنارت نواياه .......... يلقى الذهب في الحصيره
ان كنت تطلب رضى الله .......... يجعل لك الناس عبيدك
و ان كنت تطلب رضا الناس .......... أقلهم يبقى سيدك
الحلم و الصبر كنزين .......... روتشيلد محتاج إليهم
و اللي يقولوا الكنوز فين .......... ابكي يا عيني عليهم

الجماهير

مـ المستحيل انت تخدع أي طفل صغير
و تلف عقله و تعطيه القليل بكتير
لكن بأهون طريقه تخدع الجماهير
لو كنت أغبى غبي تجري وراك و تسير
خليل يصقَّف , يصقف شعب ويا خليل
من غير ما يسأل عن الأسباب و التفاصيل
و حمار يغني , و جايب من يقول له : آه
حالاً تقول الخلايق كلها و يّاه
الحق يخفى و في وسط الزحام ينداس
و ناس في فهم الحقيقه , تتكل على ناس
و يساعدك الحظ ياللي تحسن التجعير

العامل المصري

ليه أمشي حافي ، و نا منبت مراكيبكم
ليه فرشي عريان ، و نا منجد مراتبكم
ليه بيتي ، خربان و نا نجار دواليبكم
هي كده قسمتي ؟
الله يحاسبكم
ساكنين علالي العتب ، و نا اللي بانيها
فارشين مفارش قصب ، ناسج حواشيها
قانيين سواقي دهب ، و نا اللي ادور فيها
يا رب ما هوش حسد
لكن بعاتبكم
من الصباح للمسا ، و المطرقة ف إيدي
صابر على دى الأسا ، حتى نهار عيدي
ابن السبيل انكسى ، و اسحب هرابيدي
تتعروا من مشيتي
و اخجل أخاطبكم
ليه تهدموني و نا اللي عزكم باني
أنا اللي فوق جسمكم قطني و كتاني
عيلتي في يوم دفنتي ما لقيتش أكفاني
حتى الأسيه ، و نا راحل و سايبكم

المجلس البلدي

قد أوقع القلبَ في الأشجانِ والكمدِ
هوى حبيبٍ يُسمّى المجلس البلدي
ما شرّد النومَ عن جفني سوى
طيف الخيال، خيال المجلس البلدي
حتى يقول
كأنّ أمي أبلّ الله تربتها
أوصت فقالت: أخوك المجلس البلدي
أخشى الزواج، فإنْ يومُ الزواج أتى
يبقى عروس صديقي المجلس البلدي
وربما وهب الرحمن لي ولدًا
في بطنها يدّعيه المجلس البلدي
يا بائع الفجل بالمليم واحدةً
كم للعيال؟ وكم للمجلس البلدي؟

الواسطه لسا شغالة

الواسطه لسه شغاله يا رجاُُُُلُُُه ..... والحاله هياها الحاله في كل مكان
لفندي قال والاسطي هيه الواسطه ..... في كل مركز ومحطه خاتم سليمان
تشغلك وانت فراش كاتب بمعاش ..... وتدخلك السيما ببلاش ويا الاخوان
ايه اللي خلي الملعونه تصبح فينا ..... شريعه فوق شرع نبينا شرع القرآن
طماع و عايز فوق حقه واسطه تزقه ..... لرئيس عمل فاتح بقه زى التعبان
والحق بين الاتنين ضايع وهو داالشايع ..... مدير بيبلطج علي صايع عاطل كسلان
ومدير شريف حيرته حيره وحوسته كبيره ..... في مطلب الست منيره وخليل شعبان
يعفي ابنهم من الجهاديه والبلديه ..... يجيب مخالفتها عليه وعلي الجيران
داء في الكنانه متمكن او متوطن ..... وجرح ضارب ومعفن زى السرطان

باريس خلاص

يا مسلمين لما اسكندر حكم على الدنيا و دبر ..... شاف المداين و اتخير اسكندرية و سماها
يوناني و يحب الغارة و رخره زيه ام منارة ..... جبار و عاشق جباره طلع هواه وفق هواها
اسكندر اللي بجنوده الشرق و الغرب ف إيده ..... و الإنس و الجن عبيده باسكندرية بيتباهى
وافقت عظمته و جبروته لا يفوتها لحظة و لا تفوته ..... الإمبراطور في تابوته نايم هنا تحت ثراها
أما احنا يا اسكندرانية طالعين جميعاً شضلية ..... طبيعة في الطين و الميه متركبة تحت سماها
الاسكندراني إذا صافح يغلط ساعات و يروح ناطح ..... وارثها عن جده الفاتح فحل الملوك اللي حماها
الاسكندراني إذا اتحذلق جلنف لكن له مبدأ ..... يغواه لحد ما يتزحلق في نايبة عمره ما ينساها
الاسكندراني إذا اتحمس يفقد صوابه و يتطلمس ..... لحد ما يروح متكربس في نقرة إبليس يخشاها
لكن يقوم يغسل وشه و يروح يجيب اللي غشه ..... خلقته و يرح ناتشه راسين يعيش مسخة بعاهة
و نا اللي جيت من سياله فيها العيال و الرجاله ..... شجعان و لكن بهباله يا ننتصر يا أكلناها

رأس المال

جبان يفزع و يتخبىَّ ..... إذا هَبَّ النسيم حبَّه
و لما تعصف الأرياح ..... يخلي حبته قُبَّه
و لما يقولوا دي مظاهره ..... بريئة من بنات طاهرة
بنوك القطر و القاهره ..... تحط القفل و الضبه
و لو عيل بزماره ..... نفخ في أيها حاره
يقول الليلة فيه غاره ..... و أنا اللي حاكل الضربه
يا رأس المال يا متدلِّلْ ..... عايز لك للسكن منزل
فراشه ورد و قرنفل ..... و روضة فيها تتربَّى

شوقي

مكتوب لي في الغيب مصيبة ..... و الغيب عن العلم خافي
تطول حياتي الكئيبة ..... و أرثي أمير القوافي
يا شوقي ساعة رهيبة ..... لما المنايا توافي
عزيز على الشرق بات له ..... الشرق صارخ و لاطم
و قفت أرثيك بصوتي ..... و الصوت على البعد خافت
موتك ، و يا ريته موتي ..... أنطق لسان كل ساكت
و مين ما يسمع خفوتي ..... في ميتمك لما ناحت
النواحين في البوادي ..... و المنشدين في العواصم
شعوب محمد و عيسى ..... لهم مذاهب مذاهب
جامع يخالف كنيسة ..... و شيخ على عكس راهب
قروا صحايف نفيسة ..... لك فيها وحي المواهب
الكل صلوا عليها ..... القبعات و العمايم
تسأل باريس عن غيابك ..... و إنت عارف جوابها
دي مكتبك في شبابك ..... و ملعبك في شبابها
وصفتها في كتابك ..... يوم كنت تخشى خرابها
لو كان تقدر جميلك ..... تنصب عليك المياتم
من جاك وزارك في دارك ..... و قال يا دار ابن هاني
يقول لقبرك مبارك ..... اقبل يا قبر التهاني
يا قبر طال افتخارك ..... على القبور و المباني
فيك الأمير اللي ساهر ..... فيك الأمير اللي نايم

قصائد من بيرم

يا شرق فيك جو منور
والفكر ضلام
وفيك حراره يا خساره
وبرود اجسام
فيك تسعميت مليون زلمه
لكن اغنام
لا بالمسيح عرفوا مقامهم
ولا بالاسلام
هي الشموس بتخلي الروس
كدا هو بدنجان
يا بنت باني الهرم لمي هلاليلك
و البرقع اللي انخرم ويا مناديلك
يكفي لومان في الحرم
في قيد خلاخيلك
ما شفت زيك سجين ساكت و متاوي
غلبت اقول للرجال خلوا المره حره
تخش رخره المجال تفهم و تتدرى
العاقله بنت الحلال ما يضرهاش بره
لكن بتنصح ف مين روس جامده صنطاوي
جهل النسا بالعلوم خلانا انتيكه
نفهم في فن الهدوم رقعه و تشتيكه
وفي البلد عالعموم
ما تلقى فابريكه
غير فابريكات الطحين
فليحيا بدراوي
راية ولاد العرب في الارض منكوسه
طول عمرها و السبب احسان و نفوسه
والله اللي قال ما كدب نسوانا موكوسه
حتى اللي متعلمين بردون يا شعراوي
عجلي ملخبط يا خلايج و عنيه مزغللين
من نسوانك يا فرنسا البيض العريانين
يا صلاة الزين يا ما شا الله يا ولاد عالنساوين
على شط السين يا محمد نايمين و ممدين
واحده عاتعوم في الميه و التانيه في الكابين
لابسين خلجات للركبه دايبين و مجطعين
و اللحم زبده طريه كاسياه الفساتين
مطرح ما دوس و اطبش ملجاشي الا عجين
ونا هاتعجب يا خوانا يخرب عجلي التخين
اشمعني جفاهم ابيض و جفايا زي الطين
ونا ناشف ليه و معضم ودولاته متختخين
والله صغير يا محمد حبسوك سبع سنين
و امك عاتجول يا محمد واختك يا محمدين
وجرايب جرعت باشا لابسين النياشين
تلقاهم في الجزيره قاعدين و مفرشين
للبيه منهم تكريعه يسمعها اللي ف شبين
صدج من قال بلادنا دي بلاد المنفوخين
بالبنطلون و الستره عاملين متمدنين
ليل ونهار يا حبايب مساطيل و منزلين
ما يشوفوا الطور من النعجه و الفرخه م الهاجين
ابكي عليك يا معوض مسكين والله مسكين
وحديك قاعد و حبايبك في البلدان مزعوطين
زغلول باشا المجاهد في بلاد العيانين
والسلطه العسكريه قطعت ايدي اليمين
و اللورد له اوامر مكتوبه عالجبين
لا البرلمان يمسحها و لا حتى الشياطين
المنجم
ما عمري يوم للمنجم رحت استفتيه
اللي مضى اعرفه ، و اللي حضر ، انا فيه
و من كرم ربنا ، مستقبلي خافيه
لو كنا نعرف نهاية امرنا يا قوم
كام يوم نشوف السعاده والشقا كام يوم
لا يطيب لنا عيش ولا تهنا العيون بالنوم
الشر و الخير ، بلا منجم ، حا نستوفيه
ومين يا عم المنجم ؟ مفتري نصاب
الناس رآهم حيارى فاشتغل كذاب
و الكذب ابواب و نعرف كلنا الابواب ..
ان قال لي عندك قضيه ، كلنا مشاكلين
وان قال لي تسافر قريبا ، كلنا مسافرين
من دنيا رايحين لآخره ، و المخلد مين
لعن المنجم ? ولو يصدق ? كل كتاب
ومين يروح للمنجم ؟ الهمج لا غير
الست دولت ، و غانم والدسوقي بدير
و عبده افندي و زينهم ، و اسماعين و خضير
لا عقل فيهم و لا مله ، و لا ايمان
و لا حفظ بعضهم آيه من القرآن
جعلوا المنجم اله ، لك حكمه يا رحمن
جعلت قرش المنجم قرش كل سفيه
ما عمري يوم للمنجم رحت استفتيه
قصة المأذون
ايام ما كان الحريم خلف الستاره مصون
كان اي واحد جهول يفتح خطيب مأذون
يجوزك بالمقاوله .. ولا بالعربون
و انت بختك يا تسعد تلاقيها دون
استفتح الشيخ في اول ما اشتغل بطلاق
حرمه اميره .. وجوزها سئ الاخلاق
والقاضي يحكم في شرع المسلمين بفراق
على المره المجرمه ، و الراجل المجنون
الست من ناس زمان ، صاحبة ادب و كمال
م الحشمه دل الي لا خاتم ولا خلخال
والليما عطاها صيغه ، ما عطاها جمال
يكفي التقى و الصلاح و الملح و الكمون
مأذوننا كان واد عبيط عمره ما شافش حريم
من يوم ما أزهر ? لغاية ما انتهى التعليم
شاف وحده ساده .. بلا لبه و بلا مباريم
قال ما شاء الله .... و اللي كان ما شاء يكون
يا ست كان حق جوزك دا يبوس رجلك
لكنه فاسق لا يصلح لك ? ولا يليق بك
لازم اوف لك انا راجل امير مثلك
م اللي يحافظ على عرض النساء و يصون
قالت انا واحده ، لا بودره ، و لا احمر
عايزا لي راجل لا يتمرقع و لا يسكر
يعرف مقامي ولا يخبص ولا يسهر
وانشا الله آكل معاه ملح وبصل و زتون
بقت تروح للخطيب ، في كل يوم نوبتين
لحد ما شاف لها راجل قعد لها شهرين
مراته ماتت و فايته م العيال اتنين
عايز لهم واحده لو خان الزمان ما تخون
مأذوننا قال له .. انا عارف مره حره
عيني ما شافت اميره ملها مره
وبيتها مليان موبيليا من بلاد بره
رأيتها لما انتهت م الراجل المجنون
فيها البساط وحده يفرش الجامع
ودولاب عجيب لو تشوفه تلتقيه لامع
ولما كان بعلها في غشها طامع
رهن كراسيها عند القهوجي انطون
ابو العيال بات ليلتها عالمدام قاعد
والمهر خمسين جنيه فوري راح ناقد
وبعدها بجمعه كان فراشها راقد
شاف لك دي حته مره انشف من العرجون
البين نحل جسمها و الهم كاويها
والفقر راخر متمم شغلته فيها
و الموت هجم ع الحبايب من حواليها
خلا القرايب و الحبيب تحت التراب مدفون
في ليلة الدخله لابسه القميص ساتانيه
وتب طويل فوقه و البالطو القطيفه عليه
اسود طويل للقدم .. تفصيل كمال واديه
بكرك ابيض عريض و الصدر بالكبون
اما الموبيليا اللي كان طاير بيها الاستاذ
صندوق بسبعين و ستاشر صفيحه جاز
فارغين و فوقهم قبايبها تلات اجواز
و اربع مغارف خشب ابيض و ست صحون
صبح يشوف الخطيب واقف بيستنظر
طالب حلاوته خروف يتحط في انجر
ضحك و قال له نهارك يا عريس ازهر
قال له نهارك زفت متقطرن يا شيخ ينسون
قال اما انك صحيح .. مسروع و غاتوتي
مالكش صنعه الا يا مأذون يا حانوتي
سعيت لي في الخطبه وبتسعى على موتي
والاجر في الشغلتين يا شيخ على مضمون

عزرائيل

في النوم رأيت عزرائيل ..... مركيز أوروباوي
ضوفره انجليزي طويل ..... معروج و سبعاوي
و ناب يشيل ألف فيل ..... أزرق فرنساوي
و الفم يبلع قبيل ..... في مجره نمساوي
عليه قميص من سواد ..... فاشيست طلياني
و جنبه منجم حصاد ..... من صلب جرماني
و ف خرجه زواد و زاد ..... من بمب بريطاني
و معاه خناجر بولاد ..... من دقه يوناني
واقف في نص الطريق ..... و الوقفه مكسيكي
ماسك تليسكوب دقيق ..... من طرز أمريكي
ينظر في منجم عميق ..... فيه فحم بلجيكي
يستنى إمتى الحريق ..... يشعل ميكانيكي
قريت عليه السلام ..... قام رد بلغاري
طلبت منه الكلام ..... كلمني بافاري
شاورت باليد قام ..... شاورلي هنغاري
صحيت أنا من المنام ..... أقرض في أظفاري