بيرم التونسى ... أعمالة الأدبية

بيرم التونسى

مصريا خالصا من أصل تونسى عاش وترعرع على أرض الكنانة
عاش بين الناس وتفاعل معهم ولهم وأبدع فى نظمة للزجل والشعر بلغة العامة
متفاعلا معهم ومن أجلهم
تفاعل مع الناس ليس فى مصر فقط وإنما فى العالم العربى
وساعد على ذلك غناء كبار المطربين لأشعارة ومشاركته للكتابة للسينما والمسرح من صدق إحساسة

ظلموني الناس

ظلمونى الناس ظلمونى و الجانى فاتوه و تهمونى
ظلمونى الناس ظلمونى و الحق معايا و سقونى
من أساهم و لاحنوا علي ضعف ضنايا
و الدنيا على مساعداهم و أنا قلبى كبير و لالى نصير
و لاأملك غير دمع عيونى ظلمونى الناس
الظالم يعينوه على ظلمه و يزيدوا المسكين على همه
الحق أهو باين فى إيدى و يقولوا دا الحق على
و الناس قاسيين على المساكيين
حاربونى الكل و غلبونى
ظلمونى الناس
سلمت إليك أمرى ياربى
غيرك ما لقيت يرحم غلبى
اليأس تعنيه من فضلك
و اليائس تنظر له بعدلك
أنا صنع إيديك و تكالى عليك
أنصرنى على اللى ما نصفونى
ظلمونى الناس

فنان الشعب

من بعد موته بعام .......... طلعت لنا أقوام
حطّوا عليه مَكَدام .......... و قالوا فنُّه قديم
******
قديم و سوقه بار .......... و شغل طبله و طار
و شبعانين أدوار .......... و شبعانين تقسيم
******
هُوَّ القديم يا قوم .......... يقدم في ليلة و يوم
هو بصل أم توم .......... و لاَّ بلح إبريم
******
ده فنه لو ينزاع .......... و ف تسجيلات يتباع
لتصبحوا صياع .......... ما تكسبوش مليم
******
أنا عشقت بكام ؟ .......... و نا هويت يا سلام
و منيتي دي غرام .......... أروح معاها غريم
******
هو العظيم يا ناس .......... في أرضكم ينداس
و التافه الهلاَّس .......... نشبعه تكريم ؟
******
قولوا تخمنا السوق .......... حتى صبح مخنوق
بفننا المسروق .......... من إرث كل يتيم

ح تجنن

حاتجن ياريت ياخوانا
مارحتش لندن ولا باريز
دى بلاد تمدين
ونضافه وزوق ولطافه
وحاجه تغيظ
مالاقيتش جدع متعافى
وحافى
وماشى يقشر خص
ولا شحط مشمرخ افندى
معاه عود خلفه
ونازل مص
ولا لب أسمر
وسودانى وحمص
وانزل ياتقزقيز
حاتجن ياريت يا أخواننا
مارحتش لندن ولا باريز
ولا عركه فى نص الليل
دايره بالحيل
وساحبها بوليس
قدامها جدع متجرجر
وشه معور
قال ايه دا عريس
الخلق ماهى بتتجوز
واشمعنى أحنا مفيش تمييز
حاتجن ياريت يا أخواننا
مارحتش لندن ولا باريز
ولا واحده فى وش الفجر
تبرطع ماليه الدنيا صوات
قال ايه
جوز خالتى ام احمد
سلفة أخوها السيد
مات
سبحانك ماأعظم شأنك
والله الموت
دا مفيد ولذيذ
حاتجن ياريت يا أخواننا
مارحتش لندن ولا باريز
ولا واحد طالع يجرى
وواحد تانى بيجرى وراه
ويقول هاهع حصلتك
يابن اللى ابصر أيه عاملاه
لا الشارع غيط ياأخواننا
ولا احنا بداره
ولا احنا معيز
حاتجن ياريت يا أخواننا
مارحتش لندن ولا باريز
ولا واحد بيبيع حاجه
يقول بريال وتاخدها بصاغ
ياأخواننا دى حتى الابره
تاخدها بدوشه وقلب دماغ
حلفان
وعراك
ومناهدة
ويمكن ضرب كفوف
ياحفيظ
حاتجن ياريت يا أخواننا
مارحتش لندن ولا باريز
ولا فيش ميت الف صعيدى
بتوع يابصيب هاجمين
ولافيش
ميت الف معوض داعس
جاى معاه صندوق ورنيش
والله كرهت القهوة
وحرمت أقعد ع الأفاريز
حاتجن ياريت يا أخواننا
مارحتش لندن ولا باريز
حاتجن ياريت ياخوانا
مارحتش لندن ولا باريز
دى بلاد تمدين
ونضافه وزوق ولطافه
وحاجه تغيظ

بدنجان

يا شرق فيك جو منور
والفكر ضلام
وفيك حراره يا خساره
وبرود اجسام
فيك تسعميت مليون زلمه
لكن اغنام
لا بالمسيح عرفوا مقامهم
ولا بالاسلام
هي الشموس بتخلي الروس
كدا هو بدنجان

أنا في إنتظارك

انا فى انتظارك خليت نارى فى ضلوعى وحطيت
ايدى على خدى وعديت
بالثانيه غيابك ولا جيت
ياريتنى عمرى ماحبيت
عايز اعرف لا تكون غضبان
او شاغل قلبك انسان
خليتنى من يأسى اقول الغيبه دى تغيب على طول
واتفكر ايه اللى جنيت من ذنبى يسيئك مالاقيت
ياريت ... ياريت
اتقلب على جمر النار ... واتشرد ويا الافكار
النسمه احسبها خطاك والهمسه احسبها لقاك
على كده اصبحت وامسيت
وشافونى وقالوا اتجنيت
ياريتنى عمرى ماحبيت
تواعدنى بسنين وايام وتجيبنى بحجج وكلام
وتسلم وتمر قوام او تخلف وتقول لى نسيت
ياريتنى عمرى ماحبيت

الموميا

في مصر كنت الملك لك جيش ولك حاميه
ودوله غير دولتك ما تعمل الموميه
و امه غير امتك ما تزرع الباميه
ولما خشوا عليك المقبره يلاقوك
نايم مفتح .. ولكن في بلد عميه

الغش والغلا

الأكل و الشرب فى إيد اللومنجية
و الطماعين اللى غلوا الملح و الميه
و الغشاشين اللى فاقوا على الحرامية
الشاى بالمفتشر مخلوط ملوخية
والبن فيه الشعير تسعين فى الميه
و الميه و العيش برمله و طينه يا ملوخليه
و اللحم معروض بدون أختام رسمية
و الميه هيه اللبن و لا اللبن هيه
أفاعى متسيبه من غير رفاعيه
و دنيا مترتبه ترتيب فلاتيه

الصنم

هبط الجنيه من قمّته .......... و المليونير : ضج و لطم
و لما تهبط ذمته .......... الحزن ينساه و الألم
و لما تسقط حرمته .......... يظن روحه محترم
عنده الجنيهات كل شيء .......... و كل شيء غيرها عدم
أما الفقير قام و استجار .......... و من الهلع قلبه انخلع
بايت يفكر .. ليل نهار .......... ليرتفع سعر السلع
و اللحمه اهيه و الخضار .......... أسعارها حتسوق الدلع
ياما الجنيه رخّص رجال .......... و غَلىَّ أسعار الغنم
دي جيفه منتنه .......... صار ابن آدم عبدها
فليسقط الصنم الجنيه .......... اللي بتسجد له الأمم

الأرض

يا أرض مالك كرهتى كل سكانك ..... في يوم زلازل و يوم يجرفنا طوفانك
و يوم عواصف و يوم يشتد بركانك ..... راح فين بهاكى و حلمك فين و حنانك ؟
رحيمه فاضت لنا بالخير أنهارك ..... جميله متزوقة فى وشى أزهارك
طروب تعزف لنا الأنغام أطيارك ...... كريمه ما ينقطع نخلك و رمانك

يا أهل السودان ياعرب

يا أهل السودان يا عرب يا مسلمين الله !
بيننا و بينكم نسب كل الأمم عرفاه
لا أنتم نسيتوه و لا حنا للأبد ننساه
و النهر بيننا و بينكم ربنا أجراه
و اللى شرب دمكم من دمنا رويناه
و اللى ركب ضهركم فوق ضهرنا هواه
و اللى وعدكم وعدنا بالنعيم و الجاه
و أدى و أنتم عرايا محتاجين لغطاه
لو كنا ننسى قرابتنا و نجرى وراه
حينفرط شملنا و نقول يا ندماه

مدارسنا ومدارسهم

في أرضنا للأجانب ، ألف أسكولة ..... يخرجو بالألوف من غول إلى غولة
عارفين لجلب المكاسب ستميت حيلة ..... ويجمعنا من جيوبنا المال بالكيلة
واحنا وزارة معارفنا أم هليله ..... أم الحيطان والبيان، والحطة والشيلة
تاخذ ولادنا وبفلوسنا وبالتيلة ..... اشطر ما فيهم ما يكسبش عشا ليلة
واجدع ما فيهم يقول يا ست وسيلة ...... شوفي لنا حتة وظيفة تستر الميلة

صدفه

إزاى زمان النور و الحرية
صادف زمان القنبلة الذرية
يا هل ترى صدفه كده طبيعية
و لا الصدف تخفى فى حكم إلهيه
شوف لما كنا زمان الحشمة
كان ربنا ناظر لنا بالرحمه
و لما أصبحنا مجرد لحمة
اللحمة يلزمها تبات مشوية
سكتت على المنكلا قسس و مشايخ
و اللى بيوعظ زى حالى
رايح واحدة و النبي إنك بايخ
و التانيه قالت يبتليك برزيه !

من طرف **TOTO** السبت 19 يونيو 2010 - 22:52

ريـــا وسكينة

يا ولاد حكاية في البلد ..... ما تتنسيش طول الأبد
شابت لها راس الولد ..... و اختل عقل اللي كبر
يا خلق سامع صوت أنين ..... و شيء يقول يا مسلمين
و لما مالقاشي المعين ..... سكت و لا بان له خبر
يا من سمع صوت القدوم ..... في بيت على شارع عموم
و حس بيقول ياللا قوم ..... افحت يا عبد العال حفر
و جسم مين اللي اندفن ..... و نزلوه من غير كفن
من بعد ما انداس و انطحن ..... في الليل و نادى يا غفر
يا بنت دي أمك بكت ..... لما لقوكي في الجتت
متقطعة حتت حتت ..... و متقلينك بالحجر
لا بد أبكي عللي راح ..... من الصبايا و الملاح
الممدودين تحت السلاح ..... عشان رقابهم تنجزر
لا بد أبكي عللي غاب ..... و له سنين تحت التراب
ممتد في بيوت القحاب ..... لجل المقدر و القدر
ريا و جوزها في الظلام ..... نايمين على الروس و العظام
كأنه من ريش النعام ..... و لا الحرير المعتبر
اللبوة أم نياب حديد ..... بتسامر الضبع العنيد
و حش الجلنفات الوحيد ..... و إبن بياعة الجزر
بيسكروا فوق اللحود ..... فوق مرتبة محشية دود
تقرف تنام فوقها القرود ..... من دهنها اللي ينعصر
طابخين فاصوليا و سلكمه ..... و يغرفوا في الجمجمة
عنداً في أحسن محكمة ...... و لو فيها القاضي عمر
الشيء دا داير من زمان ..... و الخلق تشهد و الجيران
و ريا و سكينة ف أمان ..... ما عندناش عنهم خبر
طالع من الشباك ساروخ ..... من ريحة الشيح و الفاسوخ
و العفنة تضرب في النافوخ ..... آدي اللي خلا الشيء ظهر
انزل يا حاكم بالصرم ..... و اكسر لنا كل البرم
بزيادة دا اللحم انفرم ..... فوق الطوايل و انتظر
البنت قبله تنصطل ..... و بعد منها تنقتل
و الحبل حالاً ينفتل ..... و الجوزه ضوغري تنكسر
هاتوا المشانق و النعوش ..... و ريحونا م الوحوش
و انت يا بو البنت حوش ..... بنتك في بيتك يا بقر

من طرف **TOTO** السبت 19 يونيو 2010 - 22:57

بخمسين قرش

بخمسين قرش .......... ترفع ميكرفونك
لوش الفجر , .......... و زيادة شويه
و خمسين قرش .......... توضع نص درهم
في جيب خصمك .......... و ترميه في بليِّه
و خمسين قرش .......... تنهب أجزخانه
من المستشفيات .......... القاهرية
و خمسين قرش .......... يعفيك المفتّش
من الغرامات و .......... يشطب لك قضيه
و خمسين قرش .......... تتبدّل محاضر
بتهمه عليك .......... و تتحوّل عليه
و خمسين قرش .......... شيخ حارتك يخلِّي
ولادك , يهربوا .......... من العسكريه
و خمسين قرش .......... محفظتك تعود لك
من النشال .......... بالوسطه القويه
و خمسين قرش .......... أكتب لك مقاله
بأنك من رجال .......... العبقريه

من طرف **TOTO** السبت 19 يونيو 2010 - 22:59

المركب

يا موج البحر يا رايق واصل منين وفين سايق
اروح شرقي تتابعني واروح غربي تطاوعني
وانا في الروحة والجاية
بفكر في حبيب ليه
احبايا اللي زاد شوقي اليهم نسوني قد ما فكرت فيهم
أمانة يا نسيهم سلم عليهم
ولاطفهم ولاغيهم وفكرهم وعابثهم
على قلة مكاتبهم ..

من طرف **TOTO** السبت 19 يونيو 2010 - 23:09

العــــــــــــيون

من العيون يا سلام سلم شوف و اتعلم ....... تحت البراقع تتكلم و الدنيا نهار
عيون تقوللك قصدك إيه بتبحلق ليه ....... ما لكش شغل تعس عليه يا راجل يا حمار
و عيون تقوللك أنا عارفاك و النبي ما انساك ....... من يوم ما شفتك م الشباك يا جدع يا صغار
و عيون تقوللك روح يا رزيل يا بو دم تقيل ....... ياباي كبه في المخاليل يا ما هما كتار
و عيون تقوللك أنا حبيت ياللا بنا البيت ....... و عيون تقول انشالله ما جيت أنا رايحة الزار
و عيون تقوللك بالمحسوس أنا عايزة فلوس ....... و انشالله حتى تحوس و تدوس أنا عاملاه كار
و عيون تقوللك إمشي يا واد أنا أم ولاد ....... و عيون تقوللك عندي معاد و يا السمسار
و عيون بسر الحب تبوح كدا بالمفتوح ....... و تعرف القلب المجروح ما عليهش ستار
و عيون تسبل فوق الخد دي جد ف جد ....... و عمرها ما تكلم حد عيون أحرار
و عيون تحقق فيها بشوق تهرب على فوق ....... بتقوللك ابعد عني بذوق نظراتك نار
و عيون ما تعرف زعلانة أو فرحانة ....... صباح مسا أهي سهتانة صاحبة أفكار
و عيون لها ضحكة ف وشك بس تغشك ....... و تبص من تحت اليشمك تلقى المنقار
و عيون كدا يبقم ساهتين صفر و باهتين ....... بالشكل دا عيون الخاينين تضرب بصفار
و عيون تبص و تتسفلق واقفه شلقلق ....... و عيون تبربق و تبحلق عايزين مسمار

من طرف **TOTO** السبت 19 يونيو 2010 - 23:16

الشرق

من قبل ما اكتب أنا عارف القول ضايع
و الأجر بالتأكيد ذاهب حسب الشايع
و الشتم حايجيني مسوجر من واد صايع
مهما انكويت بالنار و الزيت برضك فنان
يا مصري و انت اللي هاممني من دون الكل
هزيل و يحسبك الجاهل عيان بالسل
من دي الكيوف اللي تصبر على كتر الذل
و نمت و العالم فايق قوم بص و طل
و شوف الشعوب و اتغص و دوب و ارجع إنسان
و اللي آلمني و بكاني انت يا شامي
ع الأكل نازل طول عمرك بارد حامي
و قلت لي لما نهيتك مصري حرامي
لحد ما الجزار خلا جرحك دامي
و الله الخروف سايب معلوف ما يفوته جعان
و المغربي المسلم راخر أبو زر فاشوك
لما انتقدته فزع قاللي يلعن ... بوك
و نا اللي قصدي أشوف قيده يصبح مفكوك
لقيته فرحان به راضي طيب مبروك
خليك فقير دق البندير و كل التعبان
روح للعراق راخر قول له كيف الأحوال
لإمتى تفضل يا أخينا بحرام و عقال
ما تعرف الجاز يستعمل غير للمشعال
الطم بقى و قول ويايه الجاز أموال
و اوعى المداس يفلت تحتاس و تقول لي أمان
يا شرق فيك جو منور و الفكر ضلام
و فيك حرارة يا خسارة و برود أجسام
فيك سبعميت مليون زلمة لكن أغنام
لا بالمسيح عرفوا مقامهم و لا بالإسلام
هي الشموس بتخلي الروس كداهو بدنجان

من طرف **TOTO** السبت 19 يونيو 2010 - 23:25

أعوذ بالله

إلا البلد يا ولاد مالها مقلوب حالها ..... في عز عصر استقلالها شبعت تشخير
كانت صلاة النبي أحسن من كده و اتخن ..... و العملة ماشية عدل معدن و رغيفها كبير
أما البلاد الدون ربحت مصر اندبحت ..... غاية ما في التهويش صبحت جرايدها كتير
يادي الغلا اللي ورانا بالخرازانه ..... و المقرعة لما هرانا و بقينا حمير
أول ما تسمع يا رمالي بخبر خالي ..... تبات و تصبح طوالي ناوي التصغير
و الفرانين كل معلم جلف مبلم ..... صدغه في الأزمة يتلم و لا صدغ مدير
طحن البلاطة و سكتنا ياللا اهتكنا ..... حطنا ف قعر التكنة و خلطها شعير
أعوذ بالله ، دي الأروام و لا دي الأغنام ..... اللي ما ينجح فيها كلام إلا بفواتير
ماحد حقه الحرق بجاز غير الخباز ..... و قلع عينه بالمخزاز ابن الخنازير
نهار ما تبقى الناس في هلاك يبني الأملاك ..... و يجيب مصاغ لمراته هناك و جنله حرير
و بحق ليه القمح يا ناس ينشال في اكياس ..... و يروح لابو بيصل و مداس و التاني أمير
قال العمى يعمي الأبعد على رأي اسعد ..... دي بلادك انت يا حاج احمد ياما فيها فقير
ما أصبحوا أهل طبنجه و روم و كمنجه ..... و اتعلموا يمزوا برنجه و خص و جرجير
زرع الأراضي اليوم طيب بكره يخيب ..... و الظاهر الفقر قريب جاي في مواسير
نهار ما تسرح بصواني عال يا سوداني ..... و يقول معانا القباني فين القناطير
بقت هو الحي الباقي شرقي شراقي ..... في الغيط خمس ست سواقي و المنزل بير
يا عم يا عبد الرحمن الشر اهو هان ..... أرجوك تعيد لي الحظ كمان و بلاش تفسير
حط المسدس في يمينك الله يعينك ..... و اعمل لنا صهبه و دينك و املاها نعير
لأن فيها برم فارت و همم بارت ..... و حدايات عفاريت طارت في أرض ابو قير
و خزانات جوه اتمدت و عين انسدت ..... و ع الطوابي اللي انهدت حانحط غفير
يقف عليها بكبوته و بنبوته ..... و النسافات دي بشلوته من وحده تطير
اسمع كلام مخلص أبده اهبد هبده ..... خليها تفرم في الكبده فرم المناشير
من مد في فرشك رجليه اتكه عليه ..... بالحيل و بظظ نني عينيه من دون تأخير
صنف الأوروباوي مرخرخ بشت ملخلخ ..... من شخطه و التانية يسخسخ زي ام بكير
المصري واد جن مقارد و تلم بارد ..... لو يلقى يوش يصبح فارد للردح حصير

من طرف **TOTO** السبت 19 يونيو 2010 - 23:32

من يوم مابقينا بشناب

الشابة أم قوام مفتول ودراع متمطع مجدول ..... لو عنها نصهين معقول الوقفة تليق للشابات
يتمرجح فيها الأتوبيس وقوامها يميل ويميس ..... وعيونها على أي عريس وعيونٌا عليها عشرات
فالواجب يابو عمو تقوم لولية وسطها مقطوم ..... تتعكز على عُكاز شوم ودواها في أربع قزازات
و واقفة وكرشها قدام في تمانية وشايله لها غُلام ..... دا سكوتك عنها إجرام ياعمل لي صبوة صبوات
والأحسن لو تبقى رقيق وتضحي في ساعات الضيق ..... وتخالف “دُرية شفيق" الطالبة بحق المساوات

من طرف **TOTO** السبت 19 يونيو 2010 - 23:35

ياورد استنظرك

يا ورد استنظرك قبل الربيع بربيع
و اوهب لك العمر
و اجعل لاهل الملامة في هواي شفيع
أوراقك الحمر
دي رقتك علمتني أبقى عبد مطيع
للبيض و السمر
و اوهب لك العمر ياللي عمرك انت قصير
و بقصر الهم
أوراقك الحمر تشرب دم قلبي عصير
يا اغلى من الدم
للبيض و السمر تهدى و انت حر أسير
تنباس و تنضم
و بقصر الهم زوالك و نت لسه جاي
في عالم الغيب
يا اغلى من الدم لونك في عروق الحي
حتى مع الشيب
تنباس و تنضم قدام الرقيب في الضي
ما فيكش من عيب

من طرف **TOTO** السبت 19 يونيو 2010 - 23:38

التغريبة

غلبت اقطع تذاكر
وشبعت يارب غربة
بين الشوط والبواخر
ومن بلادنا لأوروبا
وقلت على الشام أسافر
إياك ألاقيلي ترية
فيها أجاور معاوية
وأصبح حماية أمية
جاورت "قاسيون" وجيرته
توحش ولا فيهش حاجة
وعزرائين انتظرته مجاش
وجاني الخواجة
نافخ وسايق امارته
وقاللي / شوف السماجة
البر تحت انتبدبنا اخرج
دي ماهيش وسية
رجعت للبحر تاني مقهور
وراجع فرنسا
في بقي طعم البوداني
فاكره وأنا عمري ما
أنسي
وإن رحت تونس كفاني
عذاب أنا والتوانسة
"جملان" محضر مدافن
للأمة .. والأمة حية
في بورسعيد السفينة
رست تفرغ وتملأ
والبياعين حوطونا بكارت
بوستال وعملة
لكن بوليس المدينة متفوتش
من جانبه نملة
يا بورسعيد والله حسرة
ولسه يا اسكندرية
هتفلي هاتف وقال لي
انزل ومن غير عزومة
انزل ده ساعة تجلى
فيها الشياطين في نومه
انزل ده ديك تملى
فوقك وفوق الحكومة
نطيت في ستر المهيمن
للشط يا حكمدارية
وأقول لكم بالصراحة في قليلة
عشرين سنة في السياحة
بشوف مناظر جميلة
ما شوفت يا قلبي راحة
في دي السنين الطويلة
إلا لما شفت البراقع
واللبدة والجلابية

من طرف **TOTO** السبت 19 يونيو 2010 - 23:45

الضرائب

يسرني و يهنيني ..... أدفع ضرايب على عيني
أدفع ألوفي و ملاييني ..... لكن تعالوا حاسبوني
أكون سعيد و أكون شافع ..... لو تتصرف على شيء نافع
مثلاً مصانع و مدافع ..... و لا على القصر العيني
و اقطع لكم لحم كتافي ..... و أبيع هدومي و لحافي
و لااشوفش جايع و لا حافي ..... يغمني و يبكيني
و بادعي أيام و ليالي ..... أشوف كده السد العالي
و أقول دا مبني من مالي ..... و كد إيدي و جبيني
و يا سلام لما تجيلنا ..... النفاثات مع أساطيلنا
يومها صحيح نبقى وصلنا ..... و اقول يا عالم هنوني
و ابات مضمضم متكدر ..... لما الضريبة تتبحتر
مهيه للأستاذ بعجر ..... و عبده شخرم بسيوني
اللي ابنه بعته ف أوروبا ..... و من فلوسي بيتربى
قريب يعود زي الضربه ..... و يقول مع والدي خدوني
جثه على المكتب قاعده ..... أو في القهاوي متواعده
ماهيش سياسة و لا عداله ..... الأمة نصها شغاله
و نصها التاني عاله ..... يتبط و يقول رقوني

من طرف **TOTO** السبت 19 يونيو 2010 - 23:47

الفلاح

الأوله آه والتانيه آه والتالته آه
الأوله عيرونى إن نا فلاح
والتانيه أزرع وأقلع اللى نام وارتاح
والتالته آه للى أحبه شط منى وراح
الأوله
عيرونى ان نا فلاح – بدفيه
والتانيه
أزرع وأقلع اللى نام وارتاح – فى دهبيه
والتالته
آه اللى أحبه شط منى وراح – فى صبحيه
الأوله
عيرونى ان نا فلاح بدفيه – وعيشى حاف
والتانيه
أزرع وأقلع اللى نام وارتاح فى دهبيه – بمقداف
والتالته
آه اللى أحبه شط منى وراح فى صبحيه – ما قال لى عواف
الأوله
مش بإيدى دا قضا محتوم
والتانيه
ومسيرها ناس تغرق وناس حتعوم
والتالته
ميت هم يرحل ألف هم يدوم
الأوله آه والتانيه آه والتالته آه

من طرف **TOTO** السبت 19 يونيو 2010 - 23:49

النشال

راكب على بسكليت، بالقرش أجرها
والقرش سارقة من أمه وكان لفطارها
عشان يكايد ولاد "سنقر" وينحرها
يرمح ويشرط هدوم الناس يممارها
وبنت شايلة طبق نابت يكعورها
وشنطة الست من إيديه يطيرها
واللبة من صدرها يخطفها بزرارها
آدي اللي ناسياه قوانينها ودستورها
وله جرايم، ديوان إحصا ما يحصرها
وكاتب القسم في الدفتر يحررها

بيرم التونسى ... أعمالة الأدبية

بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية

رد: بيرم التونسى ... أعمالة الأدبية