مصر أكبر من رئيس

محمود قلماوى يكتب: مصر أكبر من رئيس



برغم حبى لك يا ريس
مصر أكبر من رئيس
مصر أكبر من برادعى
حتى لو باعها برخيص
مصر أكبر من ميدان
أكبر من مليون جبان
أكبر من سيف الإخوان
والتحرير وعياله السيس
ومع احترامى لك يا ريس
وتاريخك والكام إنجاز

مش هانسى طوابير العيش

وضحايا أنابيب الجاز

مش هانسى جيش العاطلين

وبنات داسها قطر الجواز

مش هانسى الشرطة اللى هانتنى

وكلاب السكة اللى كلتنى

ولا سابت دمى وشربتنى

ولا هانسى عروبة رجمتنى

بقالب طوب وبيوتها إزاز



وبرغم رفضى لك يا ريس

هافتكرك بالخير يا مبارك

هافتكرك بالبدلة الميرى

وطيارة بتخوض فى معارك

هافتكرك بتحرر طابا

وقائدنا وسيد لقرارك

هافتكرك تفتح فى مصانع

وأمانك فى كنيسة وجامع

وسنين العِشرة مفيش مانع

وإياك تخرج من دارك



وهاقول.. نعم.. للاستقرار

يا أمريكا يا تعابين الغار

يا جزيرة يا كذب الأخبار

أنا قبطى نسيب النبى

أنا المصرى سِيد الأحرار

أنا مصرى مؤيد معارض

ومسيحى ومسلم ورافض

أنا النيل ولو دمى روافد

يروى كل مصر عمار