من اولها خسرة رهانك؟

من أولها خسرت رهانـك ؟
من أولها الكـون حـوليك
فاتك وانت وقفت مكانك ؟
للدرجادي كنت ضعيـف ؟
...للدرجادي الـيأس مخيف ؟
ولا ده كله سحابة صيف ؟
ولا الحلم فـ قلبك خانك ؟
من أولها خسرت رهانك
إللي يشوفك قبل إمبارح
كان هيقول فـارس مغـوار
كان هيشوف الصقر الجارح
كان هيشوف معنى الإصرار
كان هيشوف الأمل الطارح
كان هيشوف الضلمة نهار
يجي يشوفك وانت مِطاطي
تايه فـ التيــار العـاتي
تبكي بدمع اليأس ليـلاتي
واقع من فوق دهر حصانك
من أولها خسرت رهانك

كلمة فـ سرك أنا مكسوف لك
أصل حقيقـي شكـلك بايـخ
مش معقولة يكون موصوف لك
تبقى في عز شبابـك شـايخ
تمشي ورجلك مـش شـيلاك
تجري ويأسـك يجـري وراك
تقفـل بـابـك والشـبـاك
علشـان أبقى صريح ويــاك
بكرة قـلوب النـاس تنسـاك
مش هاتغيب الشمس عشـانك
بتـقـول قـدرك بـطّـل خيبة
عمـر مـا فـشلك كان يوم عيبة
عيـني فـ عينـك بيـني وبيـنك
إنـت رضيـت لليـأس يهينـك
إركب فرسك دري دري جن
إمسـك جـرسـك وإنـزل رن
إرفع سيفـك وإقتـل خـوفـك
حـارب حـتى ملـوك الجٍــن
أٌرفض ظُلمك وأُحضـن حلمـك
وإمسك قلمك وإبـري السِـن
أصـرخ عـ الأوراق بالـفـن
تسمـع كـل الـدنيا آدانـك
تبقى ساعتها كسبت رهانك

لــ أسامة عبد الصابور
by: مما قرات