لما بتكون بتصلي في التراويح

.
لما بتكون بتصلي في التراويح بتلاقي واحد يقولك ياعم انت تعبان روح نام ومتكملش التراويح وصلي لوحدك في بيتك بختمتك

ولما تكون بتقرأ قران بتلاقي النوم كبس عليك وقالك ريح على السرير كدة وانت بتقرأ

ولما تكون قاعد بعد الفجر في المسجد تذكر الله مستني تصلي ركعتين الضحى تلاقي عينك بتقفل لوحدها وتلاقي واحد بيقولك ياعم انت تعبان روح انهاردة وبكرة نام كويس باليل عشان تعرف تقعد بعد الفجر

وغيرها كتير بتلاقي واحد بيكلمك واهم حاجة عنده انه يخليك تسيب الطاعة بتاعتك اللي بتعملها

عارف مين ده!!!؟

ده انت اه انت
نفسك الامارة بالسوء اخطر عدو ليك لانها عارفاك كويس اوي وعارفة ايه نقاط ضعفك

ولو سمعت كلامها ولا هتعمل الطاعة ولا دلوقتي ولا بعدين عشان كدة احسن حل انك تستعين بالله وقول يارب ومتديهاش اي فرصة تنتصر عليك

لو قالتلك انت تعبان قوم اتوضا وفوق وقاوم والله بعد ما تخلص الطاعة وتنتصر على نفسك بتفرح اوي وتحس بانشراح في الصدر هي المسألة محتاجة شوية مجاهدة للنفس

قال تعالى والذين جاهدوا فينا لنهدينهم سبلنا
جاهد نفسك عشان تفوز في رمضان ولو خسرت معركة اكسب التانية اهم حاجة متستسلمش لنفسك ودايما اعرف انه مش بقوتك لكن بتوفيق الله بس انت ابذل الاسباب